داخلة علي جواز صالونات .. طب مالك خايفه كده ليه ...اطمني وتعالي ورايا

اسم الكاتب


?كوني انثي  - داخلة علي جواز صالونات .. طب مالك خايفه كده ليه ...اطمني وتعالي ورايا



البنت العربية عموما مش المصرية بس عندها نقص فظيع في خبراتها في الحياة لانها بتعتمد علي نصايح صاحباتها لما بتيجي تتعرف علي حد عايز يخطبها
والنصايح دي معظمها بيجي بنتايج عكسية لانها بتعتمد علي افكارهم الخاصه عن فتي الاحلام وما يصاحب احلامهم من معايير غير واقعيه



ده غير ان في بنات بيتصرفو باسلوب غلط مع العريس فبيروح ومبيرجعش تاني ويتكرر الموقف وتكرر غلطها ويروح برضه بلا رجعة وتفضل بقي متضايقه وزعلانه ومتبصش لاخطائها عشان تصلحها



ولازم تعرفي الاسئلة اللي المفروض تقوليها في لقاء التعارف وازاي تتصرفي مع العريس وايه هي التحفظات علي مظهرك وسلوكك عشان متكونيش من نوعية البنات اللي الشباب بيخافو يتجوزوهم

وانا هحاول باذن الله اقولك ازاي افضل طريقة للتعارف علي شريك الحياة ...
لما ربنا يفك العقده ويتقدم واحد كده عشان يخطبك طبعا هتفرحي والعيد فرحة والحركات دي عشان في حد جه يخبط علي بابك وعايزك
بس ممكن يجيلك احيانا احساس انك زعلانه ومتضايقه وعندك من جواكي احساس غريب لانك هتتجوزي بطريقة تقليدية مش عن طريق الحب وعالم الحلام اللي حلمتي بيه
في بنات كتير بتعيش في صراع جوا نفسها رافضه تتجوز جواز تقليدي وفي نفس الوقت خايفه تستني الحب لانها مش مطمنة لجدية الشباب
بس البنات دي مفكرتش ان الحب يعني اختيار والجواز التقليدي مش بيتم الا بالموافقه والموافقه يعني اختيار
صحح



الحقيقة اننا وقعنا ضحية للتضخيم الاعلامي بين الاغاني وافلام تامر حسني ومحمد فؤاد 
(( بمووت في تامر ده يخربيته ههههههههه احم احم )
المهم ان الحاجات دي كانت نتيجتها اننا بقينا ننام ونقوم نحلم بقصة الحب اللي تنتهي بالجوااز
علي فكرة انا اتخطبت عن قصه حب بس مش معني كده ان كل قصه حب تنتهي بجواز لا في بنات بتسبب ليهم من قصص الحب دي الم نفسي كبير اوى وممكن تفقدها الثقه في نفسها
ده غير ان الحب مربوط في دماغنا باننا نسمع الكلام الحلو الي يدووووخنا وتفضل بقي الواحده تعمل مقارنة ما بين خطيبها او زوجها وما بين اللي كانت مرتبطه بيه عاطفيا
وتتجاهل ان خطيبها ده عمل موقف عملي انه جالها واتقدملها وكان حريص علي الارتباط الرسمي بيها وتفضل تدور بسس علي انه مش بيقول كلام حلو

ومين يااوختشي راجل بيقول كلام حلو



لكن البنت الذكية هي اللي تفرح باللي بيتقدم عشان يخطبها وتحرص انها تبدأ معاه حياة جديده وتتخلص من ذكرياتها القديمة وتطردها من دماغها خااالص وماالص كمان
وكل ما يجي الشيطان يلعب في دماغها ويفكرها بالذكريات السودا دي تطلعها من تفكيرها خالص وتفكر بس ازاي تحسن علاقتها مع العريس وتفهمه كويس



البنت الواعية هي اللي تكون فاهمه كذب كل اللي بيجي في الاغاني والافلام وتعرف برضه ان ابطالهم مش بيعيشو المشاعر دي في الواقع وان اول قصه حب لازم تعيشيها هي حبك لنفسها
وانا مش قصدي هنا الانانية لكن تحبي نفسك وتحافظي عليها من قصص الحب اللي هتوجع قلبك

يعني لما يتقدملك عريس من حقك تفرحي لشعورك انك مرغوبة وبعدين تهدي خالص سواء ذهنيا او جسديا عشان تقرري مع نفسك قبل ما تشوفي العريس انتي عايزة ايه وتحددي حاجات مهمه اوى

مثلا :
- ايه الصفات اللي عايزاها تكون موجودة في شريك حياتك
وايه اولويات ترتيب الصفات دي زي ما انتي عايزاها مش زي ما الناس اللي حوليكي متوقعينها
- طب ايه الصفات اللي ممكن تسامحي فيها وتعديها لو مكانتش موجودة في العريس


بس خلي بالك يا كوكو افتكري كويس اااوى مفيش واحد كامل الكمال لله سبحانه وتعالي
يعني لازم تكبري دماغك من شوية عيوب في مقابل ان في مميزات

اما بقي لو محددتيش اولوياتك فتاكدي انك هتشوفي عيوب العريس بسسسسسس ومش هتقتنعي بالمميزات اللي فيه حتي لو فيه مميزات كتيرة
لانك هتدوري علي العيوب 

بس في عيوب محتملة يعني تقدري تتعايش معاها لانك برضه اكيد فيكي عيوب



وياريت تحطي في اولويياتك تدين العريس لان الشاب المتدين هيكون حريص جدا انه يريحك ويسعدك وهتكوني مبسوطة معاه دينيا ودنيويا
ييعني اتنين في واحد

وطبعا تحددي مع نفسك اسبابك اللي هتخليكي توافقي تتجوزي
هتتجوزي عشان تهربي من العنوسة ؟؟؟؟؟؟ ولا عشان تكوني اسرة سعييدة ؟؟؟ ولا عشان متكونيش اقل من صحباتك ؟؟؟



والاجابه مهمه اوى ولازم تكون صادقه عشان متقبليش واحد مش مقتنعه بيه بدافع الهرب من العنوسة
وتدعي نفسيا انك موافقه وبعد كده متقدريش تستمري في الادعاء ده فتضخمي عيوبه وتنتهي الخطوبة
او تجوزي ويحصل طلاق
او تعيشي حياة زوجية تعييسه
لاقدر الله طبعا

وانا مش برفض احساسك بالخوف من العنوسة لكن مينفعش يكون العامل الاساسي في قبولك الزواج اما اللي تعمل كده فلازم تفتكر انها خلاص نجت من شبح العنوسة وعملت اللي هي عايزاه
فتهدي بقي شوية وتتجاهل عيوب زوجها وتستمتع بمميزاته متخربش علي نفسها يعني 

معظم البنات بتشتكي لما بتقابل العريس انها محستش بالحب من اول نظرة ولا بالانجذاب وكأن الواحده منهم فاكرة انها اول ما هتلقي النظرة الاولي هيغمي عليها من الخضه ههههههه قصدي من الحب يعني والا الجوازة تبوظ
وعلي راي عادل امام الجوازة باظت الجوازة باظت 

وطبعا ده خطأ منتشر المهم ان يحصل نوع من الارتياح النفسي والشعور بالقبول ولو بدرجة بسيطة بعد كده بقي تغذي الشعور ده بالتعارف عليه قبل الاتفاق علي الخطوبة وطبعا متستعجلش ويكون الكلام ده في اطار الاسرة وتحت عنيهم وعليكي انك تقنعي اهلك بكده باسلوب لطيف ان ده افضل بكتير انك تخطبي وتفركشي لاقدر الله يعني بعد ما تلاقي اختلاف في الطباع او الاحلام والطموحات



وبرضه احذرك من انك تفضلي متردة وتكوني عازة توصلي لاعلي مرحلة في التوافق مع العريس لان ده ممكن يعمل نتايج عكسية الاعتدال هو اللي مطلوب ومادام حاسه بدرجة كويسة انك مقتنعه بالعريس مع شعور نفسي انك مبسوطة لما بتكوني معاه ومش بتضايقي ولا بتنفري منه وعايزة تعرفيه اكتر واكتر وحاسه ان معندكيش مانع تقضي بقية حياتك معاه ساعتها تقدري توافقي علي الخطوبة



وفي بنات كتير بتحس بالخوف قبل ما تعلن موافقتها علي الخطوبة لا وممكن الاحساس ده يستمر بعد الخطوبة وممكن كمان اول سنة من الجواز وده احساس طبيعي لان البنت بتحس انها بتعمل حاجه مصيرية في حياتها ومن الطبيعي تحس بالخوف لكن ياريت تستغلي الاحساس الطبيعي ده في مصلحتك مش ضدك

ولازم تكوني حريصة جدا انك تتعرفي علي العريس بكل مميزاته وعيوبه وتهتمي بكل اللي بيقولو اهلك عنه بالسلب او بالايجاب ومتنفضيش لكلامهم او تهاجميهم لان غير انهم خايفين علي مصلحتك هما برضه عندهم خبرات اكتر في الحياة ومن الذكاء انك متهمليش الاستفادة منهم



وخلي بالك برضه من نقطة مهمه جدااا
الوسيط اللي جايب العريس تخلي بالك منه ومتمشيش ورا كلامه اللي هيفضل يردده عن مميزات العريس لان ممكن يبالغ بحسن نية عشان يتمم الجوازة ولازم تتاكدي بنفسك من المميزات دي فعلا وتنتبهي لعيوب برضه عشان تعرفي تتعامي معاها ومتتفاجئيش بيها
في حكمة بتقول
الانسان المفاجيء انسان نصف مهزوم
عشان كده بتفشل جوازات كتيرة بسبب التسرع في اتمام الزواج من غير تعارف حقيقي وتحصل بقي الصدمة بعد الزواج ما تكتشف العيوب وتحس البنت انها اتخدعت ومتعرفش تعامل بطريقة سيمة مع عيوب زوجها
وهي كانت في غني عن كل ده لو كانت ركزت في عيوبه قبل ما تجوز

وطبعا مش هفكرك بضرورة انك تصلي استخارة وكمان ركعتين بنية صلاة الحاجه عشان ربنا يوفقك في اللي يحققلك السعادة في الدين والدنيا ان شاء الله

وتدعي علي طول يارب لو في خير قربه ولو شر ابعده توكلت عليك وعلي الله فليتوكل المتوكلون

وبكده تكوني عملتي كل الخطوات الصح في انك تختاري كويس سواء بعقلك او بقلبك وقبل كل ده وبعده التوكل علي الله



في حاجه تانيه كمان بتحتار فيها البنات وهي ايه المعايير اللي المفروض تكون موجودة عند العريس عشان البنت تتاكد من نجاحها في الاختيار
بس خلي بالك في فرق كبير بين المواصفات الجيده والمواصفات المناسبة

يعني مثلا انتي مش هتتجوزي واحد عشان هو كويس لكن عشان هو يناسبك
يعني يكون موجود بينك وبينه توافق في امستوي الاجتماعي بين اسرتكم عشان يسهل التعامل بينكم وعشان كمان العادات والتقاليد تكون قريبة
ان لو في فرق في العادات والتقاليد هتلاقي بعد الجواز كل يوم مشكلة
كمان طبعا تخلي بالك يكون في تقارب علمي لان لو فيه فرق كبير في النقطة دي مش هتكون في صالحك انتي او هو
وطبعا يكون موجود تقارب نفسي يعني متحسيش ان في حواجز نفسيه بينك وبينه لكن تحسي براحه في الاول واراحه دي تبشرك بالتقارب بينكم بعد كده بس خلي بالك متخدعيش نفسك طبعا وتقولي اه انا حاسه اني مرتاحه وانتي تكوني لا


وطبعا متنسيش اهمية ان ميكونش في فرق كبير في السن عشان اهتمامتكم وميولكم تكون قريبة بحكم انكم تكونو منتميين لجيل واحد ويفضل انه يكون اكبر منك مش العكس عشان يكون عندك استعداد نفسي طاعته في المستقبل ان شاء الله وتستفيدي من تجاربه وخبراته في الحياة وتحسي انه مكن يعرف يتصرف في اي موقف كن ده مبيحصلش غالبا لو انتي اللي اكبر منه الا اذا كان عندك درجة ذكاء عالية خليتك تديله القيادة جوا الاسرة

ولازم عموما يكون عندك ذكاء ما تلاقي حاجه مش عجباكي في تصرفاته فتوجهيه بشكل غير مباشر من غير ما تحسيه انك بتديله اوامر او انك احسن منه في التفكير او عايزة تاخدي مكانه جوا الاسرة

ولازم تعملي كده عشان تريحي دماغك من المشاكل والخناق



ايوه سمعاكي ياللي هناك بتقولي طب ازاي بقي اتعرف علي العريس واخليه يقبل بشروطي وازاي اخليه مبسوط وعايز يتجوزني مش يشوفني مرة وبعدين يطلع يجري وولا حس ولا خبر
زي ما بيحصل في اكتر من مرة رغم ان العريس بيكون مقبل جدا علي الجواز قبل ما يقعد معايا ويتعرف عليا

وعشان الموضوع ده مهم جدي هكتبه ان شاء الله في موضوع تاني